I den 19. runda i Tippeligaen tok me imot sjølvaste Rosenborg til kamp på Fosshaugane Campus. Vår nyaste signering Ricardo Santos fekk sin første kamp på heimebane då han fekk starte kampen.

Me starta friskt. Allereie i det første minuttet fekk me frispark på høgrekanten. Malick Mane la perfekt inn til Santos, som heada ein halv meter over.

Like etter fekk me innkast midt på Rosenborg sin banehalvdel. Då fekk Taijo Teniste vise fram sitt nye saltoinnkast. Ballen gjekk heilt inn på fem meter, men det vart dessverre for enkelt for Daniel Örlund i målet til Rosenborg. Angrepsvåpenet vårt har fått ei lengre rekkjevidde!

Örlund kasta ballen ut, men der var Henrik Furebotn aggresiv og vann ballen. Han sette fart mot mål og kom inn i straffefeltet, men rett før han fekk skutt fekk Rosenborg-forsvaret sett in ei takling. Men det var ingen tvil om at me hadde starta kampen best.

Sju minutt spelt då Kenneth Udjus måtte ut på 20 meter og takle etter ei feilpasning i forsvaret.  Heldigvis kom vår solide keeper på ballen før Rade Prica kom seg forbi. Glimrande opptreden av Udjus.

Me var best det første kvarteret, men etter kvart kom Rosenborg meir med i kampen uten å skape dei heilt store sjansane. Markus Henriksen var farleg frampå då han fekk skutt frå 13 meter, men me fekk blokkert til hjørnespark.

Stephané Badji var attende etter OL-fotball for Senegal, og han viste teikn på form. I første halvleik var han høgt og lågt, og vann brorparten av duellane han var med i.

Rade Prica fekk ein god sjanse til å sende trønderane i føringa ti minutt før pause, men skotet frå 16 meter skrått hald gjekk i nettveggen. Bortsett frå det var det lite å skrive heim om før spelarane fekk 15 minutt i garderoben på stillinga 0-0.

Me var først ute med ein sjanse i andre halvleik då Tonny Brochmann fekk nikka ned til Santos. Han knalla til på direkten, men den velkjende ryggsekken var på, og då enda skotet godt over.

Etter dette var det, dessverre, omtrent berre Rosenborg som skulle stå for det målfarlege i Sogndal denne kvelden. Borek Dockal var først ute då han fekk skutt i stanga og i ryggen til Udjus. Ballen rulla langs streken då Gustav Valsvik fekk rydda unna rett føre Mikael Dorsin.

Prica fekk óg ein flott sjanse då han kom åleine med Udjus, men det som skulle ha vore ei enkel avslutning vart ei håplaus avslutning to meter utanfor mål.

20 minutt før slutt fekk trønderane straffe. Rosenborg fekk spelt inn til Tarik Elyonussi fri inne i 16-meteren, og ut kom Udjus. Elyonussi tuppa ballen forbi Udjus og fekk straffe. Dockal sette ballen nede til venstre for Udjus, og med det stod det 0-1.

Berre nokre få minutt etter fekk Rosenborg ei ny straffe. Henriksen finta seg fri inne i 16-meteren og la an til skudd. Valsvik la seg ned for å takle, noko som førte til at Henriksen sparka Valsvik rett i foten. Dommaren bles straffe medan Valsvik låg att i smerter. Ei kontroversiell avgjerdsle!

Dockal sette ballen i det same hjørnet, og Udjus var sjanselaus. 2-0.

Me bytta inn Ørjan Hopen, Stian Dyngeland og Elvis utan at det gav nokon særleg effekt. På overtid utnytta John Chibuike ukonsentrert forsvarsspel og trilla inn Rosenborgs tredje frå skrått hald.

Rosenborg vann alt i alt fullt fortent, og no har me ein del å jobbe med før Sandnes Ulf ventar i neste runde til ein veldig viktig kamp i botnen.