Kaffi og studentar heng tett saman. No kan du kjøpe deg ein god latte eller ein konsentrasjonsskjerpande espresso i Saman Kafebar som ligg i fyrste etasje i Innovasjonsbygget, Fosshaugane Campus. Det er Studentsamskipnaden som står for den daglege drifta.

Tysdag 23.januar opna den åttande kaffibaren som ligg under Høgskulen på Vestlandet. Etter fusjonen mellom Høgskulane på Vestlandet var det tidleg eit tema og ynskje om å oppretta ein kaffibar også i Sogndal. Innovasjonsbygget hadde eigna plass, og rommar no eit flott tilbod om kaffi, mat og møteplass.

Ein student frå Høgskulen på Vestlandet fekk æra av å klyppa det raude bandet, og erklæra Saman Kafebar for offisielt opna. Dei mange som møtte fekk smaka kaffi og kaker, og føla på stemninga med lukten av brende kaffibønner.

Direktør for Studentsamskipnaden Saman/Sammen, Per Kristian Knutsen, ynskte alle velkomne. - Det er komne to baristaer som er svært interesserte og dyktige i faget sitt. Eg fekk servert den beste espressoen her, endå eg ikkje likar espresso, fortel Knutsen. Han fortel at det er svært populært med kaffibarar i tillegg til studentkantinene.

Både Vibeke Johnsen for Sogndal kommune og Kristine Timberlid for Innovasjon Noreg takka for det nye tilbodet. - Det er flott å ha ein plass til arrangement og frukostmøter, seier Timberlid.

Dagleg leiar i Sogndal Fotball Yngve Hallèn var godt nøgd med at den siste delen i Innovasjonbygget no var opna.

- Dette er blitt eit flott området og ein møteplass som me håper folk vil bruke 365 dagar i året. Og på Fotballkampar. Me er opptekne av å etablere lokaler der fleire kan trivast, og her i Kaffibaren ligg det tilrette for akkurat det, seier Hallèn.