Andreas Van der Spa er på plass!
Midtstopparen er klar for spel i kvitedrakta allereie no
Øygarden FK og Sogndal Fotball er samde om ein overgang for Andreas Van der Spa (f. 7/1-1999).
Andreas og Sogndal Fotball har signert ein avtale som går til 31/12-2023. Spelaren er speleklar for Sogndal.
- Dette er ein spelar me har fulgt med over ein periode. Først var tanken at han skulle koma til oss etter årsskiftet, men me er veldig glade for at han er hjå oss allereie no, seier Håvard Flo, som vil takka Øygarden FK for godt samarbeid i samband med overgangen.
- Andreas vil passa godt inn i denne gjengen, seier trenar Eirik Bakke.
Andreas er ein kar frå Bodø som er flaska opp i Glimt-systemet. Han starta med fotball i Vinkel i lag med Jens Petter Hauge, der pappa Hauge var trenar. Då han var 12 år gjekk han til Glimt.
Det er ein høgreist kar me får inn porten på Fosshaugane. Med 196 cm på sokkalesten ragar han godt over Håvard Flo.
- Mange trur at eg er ein litt keitete midtstoppar, sidan eg er så høg, men eg føler meg komfortabel med ballen i beina og spelte midtbane tidlegare, fortel Andreas, som allereie har markert seg som ein kar som lar kjeften gå på treningsfeltet.
- Eg likar å ta tak, og eg pratar mykje baki forsvaret der.
Underteikna kan beretta at han lar skravla gå på utsida av bana óg. Me får inn ein glad, hyggeleg og pratsom kar som har gitt eit særs godt førsteinntrykk.
- Eg vil kalla meg ein glad fyr - ein vanleg nordlending, seier han med eit flir.
Med eit lunt smil og omtanke for andre, vil denne karen gå greitt i lag med resten av gjengen.
- Eg ser på meg sjølv som ein inkluderande kar. Har dei andre rundt meg det bra, har eg det bra!
Endre Kupen og Andreas er gamle kjenningar frå Bodø/Glimt
Andreas fekk proffkontrakt med Bodø/Glimt og står med ein offisiell kamp for dei gule. I fjor gjekk han til Alta på utlån ein halv sesong, før Øygarden henta han til Ågotnes i vinter. Han har spelt alle kampane i årets sesong og skåra eit mål då Øygarden slo HamKam med 4-3.
- Eg vart veldig god kompis med Fredrik Flo i Øygarden, fortel Andreas, som óg starta på skule i Bergen.
- Ja, eg har starta på eit studie som barnehagelærar, eg skal sjekka om eg kan vidareføra det her i Sogndal.
Men først og fremst skal han no vera fotballspelar, og han meiner at hjå oss ligg alt til rette for ein fin utvikling.
- I Sogndal har me jo alle fasilitetar, eg merker at eg kjem til ein klubb der alt ligg til rette for oss. Eg har eit ønske om å gjera det så bra på trening at eg får speletid og ein plass på laget. Eg håpar å få spela mot dei beste i landet i Eliteserien med Sogndal, avsluttar Andreas Van der Spa.
Me ser fram til fine år i lag med denne kjekke karen frå Bodø! Velkomen til Sogndal!
