Dører opne – og kunnskap delt mellom Sogndal Fotball og Øvrevoll Hosle IL

Førre veke hadde Sogndal Fotball gleda av å ta imot ØHIL Fotball frå Bærum, som var på ein todagars studietur for fagleg og sosial utvikling. Delegasjonen bestod av 12 tilsette som ønskte å lære meir om korleis Sogndal jobbar med toppsatsing, akademi og breidde.

Fagleg program frå morgon til kveld

Gjennom to dagar fekk ØHIL innblikk i korleis klubben jobbar på tvers av avdelingar. Programmet starta onsdag kl. 09.00 og strekte seg heilt til 18.00, før gruppa fortsette torsdag frå 10.00 til 13.30.

Gjennom presentasjonar og samtalar fekk gjestane møte trenarar og leiarar frå fleire delar av organisasjonen. ØHIL fekk mellom anna lære meir om:

• Arbeidet rundt A-lag herrer.
• G19 / Sogndal 2 og brua til A-laget.
• Nasjonale satsingslag.
• Sogndal FK Damer og utviklingstrappa vår i kvinnefotballen.
• Korleis Sogndal organiserer breiddeavdelinga og jobbar med frivillige.

I tillegg til teori fekk ØHIL observere fleire treningsøkter ute på bana. Dette gav eit konkret innblikk i korleis klubbens prinsipp vert omsett til praksis i kvardagen.

Imponert over delingskultur

Besøket resulterte ikkje berre i fagleg påfyll – også miljøet og gjestfriheita gjorde sterkt inntrykk.

– Sogndal Fotball gav oss eit unikt innblikk i korleis det blir jobba, og det er imponerande nok - men eg trur det sterkaste inntrykket på mange var gjestfriheita og delingskulturen me opplevde blant dei tilsette. Det var heilt fantastisk, seier Anders Hille Stadheim i ØHIL.

For Sogndal Fotball er denne typen samlingar viktige.

– Me ønskjer å vere ein klubb som deler kompetanse med andre miljø i norsk fotball. Når me kan lære av kvarandre, blir norsk fotball betre – både på topp- og breiddenivå. Klubbane er forskjellige på mange måtar, men me står likevel i fleire like problemstillingar. I løpet av desse dagane, trur me at begge klubbane sit att med nyttige erfaringar til vidare klubb- og lagsutvikling, seier Kristian Ask og Rune Bolseth som fasiliterte besøket.

Sogndal Fotball takkar for besøket, dei gode samtalane og engasjementet – og ønskjer ØHIL lukke til vidare!

Velkomen tilbake til Sogndal – dørene står alltid opne!

STAO NO PAO!