Forlengar viktig samarbeid med Intersport Sogndal

Avtalen omfattar både topp- og breiddefotballen, og sikrar tilgang på utstyr, klede og fagleg kompetanse i heile klubben. Samarbeidet legg eit solid grunnlag for aktivitet og utvikling frå dei yngste spelarane og heilt opp til A-laget. 

– Dette er ein svært viktig avtale for oss. Intersport Sogndal har over tid vore ein solid og påliteleg samarbeidspartnar som bidreg både med kvalitet og kompetanse inn i klubben, seier konstituert dagleg leiar Ingrid Narum. 

Dagleg leiar i Intersport Sogndal, Reidar Dvergedal, er òg tydeleg på betydninga av samarbeidet: 

– Sogndal Fotball er det store flaggskipet innan lagidrett i vår region og ein særs viktig samarbeidspartnar for bedrifta vår, og for utviklinga av næringslivet i regionen. Kombinasjonen av toppidrett og breidde passar perfekt inn med vår profil, og skapar stor aktivitet, samhald, ambisjonar og mykje idrettsglede rundt oss. 

– Me er svært stolte av å få vere med å levere idrettsutstyr til klubben, og på den måten medverke til å bygge meir aktivitet, identitet og styrke den sterke merkevara som Sogndal Fotball er. Me gratulerer klubben med jubileumsåret og gledar oss stort til eit langt og godt samarbeid også i tida som kjem. 

Samarbeidet spelar ei sentral rolle i kvardagen til både små og store spelarar i Sogndal, og er med på å sikre at nye generasjonar får dei same moglegheitene til å utvikle seg, både på og utanfor bana. 

I eit historisk jubileumsår for bygda og klubben, der Sogndal IL feirar 100 år og Sogndal Fotball markerer 50 år samanhengande i norsk toppfotball, er Sogndal Fotball og Intersport Sogndal klare til å byggje vidare på historia, styrkje fellesskapet og leggje grunnlaget for nye framsteg i åra som kjem.