Kristoffer Bidne er vår nye marknadssjef!

Kristoffer Bidne, f. 1996, er Sogndal Fotball sin nyaste signering, og frå 1. februar trer han inn som marknadssjef i klubben. 29-åringen frå Voss er ein erfaren fotballmann, og har mange kampar for både FBK Voss og fleire klubbar i Bergen. No overtek han rolla til Terje Teigen og skal arbeide tett med våre flotte samarbeidspartnarar.

Kristoffer Bidne kjem frå Voss, og for dei som følgjer norsk fotball tett, er han truleg eit kjent namn. 25 kampar i OBOS-ligaen, 99 kampar i 2. divisjon, 79 kampar i 3. divisjon og 73 kampar i 4. divisjon fortel om ei innhaldsrik karriere og erfaring frå toppfotballen. 110 seniorkampar for FBK Voss er ein sterk prestasjon, og han har faktisk møtt Sogndal i OBOS-ligaen 2 gonger for Nest-Sotra og Åsane. No ventar eit nytt møte med toppfotballen, og denne gong får han oppleve den andre sida av ein fotballklubb.

- Eg flytta frå Voss til Bergen når eg var 16 år, og hadde planar om å bli fotballspelar. Det var det som trigga meg, og eg tok ein sjanse på å flytte til Bergen. Sidan har eg hatt ei fotballkarriere på ulike nivå i norsk fotball, fortel Bidne.

Utanfor fotballen har det vore familiebedrifta som har vore yrket for Kristoffer:

- På Voss driv familien min gravferdsbyrå, noko dei har drive i mange mange år. Eg har på ein måte vorte fødd litt inn i den bransjen, og dei siste åra har eg jobba med gravferder i Bergen. Det er det som har vore yrket mitt utanfor fotballen, og som eg har fått kombinere fotballkarriera med, fortel han.

Det er ingen tvil om at Kristoffer er ein fotballmann, og at fotballen har betydd mykje gjennom livet. Når han no skal i gang med ei ny side av fotballen blir det mykje nytt, og han gler seg til å få jobbe i ein toppklubb som Sogndal:

- Fotballinteressa har eg hatt heile livet, og eg har ein aktiv fotballfamilie med både foreldre og brødre der Leeds var laget. Me har fått det inn heilt frå starten, og det har alltid vore fotball som har vore det viktigaste, noko det framleis er, fortel han.

- Eg trur det blir veldig lærerikt og kjekt å få jobbe i ein fotballklubb. Eg har jo fått kjenne litt på nivået som fotballspelar i OBOS-ligaen og veit litt om kva som krevst og kor mykje som blir lagt til rette rundt laget. Det blir veldig spennande å få sjå jobben bak, og å få bidra på ein annan måte enn som spelar. Det er veldig gjevt og ei utfordring eg gler meg skikkeleg til. Eg er svolten, ambisiøs og likar ei utfordring, men går også inn i dette med stor respekt for det som er gjort før. Den fyrste tida vil eg bruke på å lære å kjenne denne jobben, og å få satt meg godt inn i både eksisterande avtalar og nye moglegheiter som kan dukke opp, legg han til.

Sjølv om Kristoffer formelt byrjar 1. februar vil han allereie no starte arbeidet med å gjere seg kjent med rolla, og alt den inneber. Denne veka har han hatt gode samtalar med Terje Teigen, og begge er positive til vegen vidare. Om bedrifta di ønskjer å bli ein del av partnarnettverket vårt håpar me de tek kontakt:

- Eg er ein person som er glad i å jobbe med folk, og er ein ganske utadvendt type. Eg er ikkje redd for å gå i møte med nye folk, og eg gler meg veldig til å møte alle i klubben og dei ulike partnarane våre. Eg og Terje har allereie fått nokre gode samtalar, og det føles som om me snakkar same språk. Dette blir kjekt!

Me ønskjer Kristoffer hjarteleg velkommen til Sogndal, og gler oss til han kjem i gang i si nye rolle. Saman med samarbeidspartnarane våre skal me sørge for at han får ein god start, og at dette kan bli eit godt samarbeid!

Det omtalte samarbeidet med Bjørn Tore Årevik i arbeidet mot nasjonale partnarar vil ikkje bli iverksett. Klubben har tilsett Kristoffer Bidne som ny marknadssjef, og han vil ha det fulle ansvaret med å leie og representere klubben sitt marknadsarbeid. Det er klubben si vurdering at maknadsinnsatsen bør samlast under Bidne sin strategi og konsept, og at han dermed bør vera klubben sin primære representant i marknaden.

STAO NO PAO!