Runde 22: Sogndal - Lyn

Etter ei helg utan OBOS-ligafotball er det endeleg klart for kamp igjen! Me tek i mot Lyn på Fosshaugadn og går for siger!

Lyn er eit lag som har tatt akkurat like mange poeng som oss, men betre målskilnad plasserer dei hakket over oss på tabellen. På bortebane står dei med 3 sigrar, 3 uavgjorte og 4 tap, og sigrane kom mot Mjøndalen, Start og Aalesund. Imponerande resultat som 7-1 heime mot Stabæk viser at Lyn kan scora mange mål, og målskilnaden 43-30 er 3. best i ligaen.

Anders Bjørntvedt Olsen er toppscorar for Lyn og står med 9 scoringar. Vidare på lista finn ein Mathias Johansen med 7 og Jacob Hanstad med 6 scoringar. Dei same namna toppar også lista over flest målgivande pasningar, som viser at dei er viktige angrepsvåpen.

I sommar møtte me Lyn på Bislett Stadion, og me reiste heim frå Oslo med 3 poeng. Dei kvite og raude tok leiinga tidleg i kampen, men Felix Eriksson og Edmund Baidoo scora kvar sitt mål og snudde kampen før pause. I andreomgang forsvarte karadn leiinga på ein meisterleg måte, og kampen enda 1-2. Sjå høgdepunkta i videoruta under:

Karadn fekk fri førre helg, og denne veka har ein byrja førebuinga inn mot ein ny kamp. Etter ein dårleg periode er me klare for å komme tilbake på vinnarsporet, og me treng hjelp frå deg på tribuna! Ta med deg vennar og familie til Fosshaugadn og kom på kamp!

Før kampen ønskjer me velkommen til Skraol! Her kan ein møte andre supportarar i forkant av kampen og lade opp til kampstart. Det blir intervju av aktuelle personar, tipping av pauseresultat og mykje god fotballprat. Skraol opnar 1,5 time før kampstart!

Kjøp billett her!

STAO NO PAO!