Samarbeidet med Wattn held fram
Sogndal Fotball og Wattn forlengjer samarbeidsavtalen, og straumselskapet blir med vidare som partnar også i 2026-sesongen.
Wattn kom inn før 2025-sesongen, og har sidan vore ein synleg og aktiv del av partnarfamilien. Mellom anna er dei profilerte på drakta.
Kva held Wattn på med? Les meir om dei her.
– For oss handlar samarbeidet med Sogndal Fotball om meir enn synlegheit. Klubben representerer mange av dei same verdiane som me ønskjer å stå for; fellesskap, utvikling og lokal forankring. Me ønskjer å bidra til eit sterkt lokalsamfunn, samstundes som me byggjer kjennskap til Wattn og kjem tettare på både privat- og bedriftskundar på Vestlandet, seier Frank Torheim, sal- og marknadsdirektør i Wattn.
Felles røter og ambisjonar
Wattn er ein straumleverandør med røter på Vestlandet og kundar over heile landet. Sogndal Fotball er på si side ein av dei mest tradisjonsrike klubbane i regionen.
Samarbeidet byggjer på eit felles ønskje om å styrkje lokalsamfunnet og bidra til utvikling i regionen.
Wattn leverer i tillegg straum til Fosshaugane Campus, der toppidrett, utdanning og næringsliv møtest.
– Det gjer samarbeidet ekstra meiningsfullt at me ikkje berre er partnar, men også leverer straum til Fosshaugane Campus og bidreg til energien som held aktivitetane i gang, seier Torheim.
Vil skape meir liv rundt kampane
Inn mot denne sesongen ønskjer me å utvikle samarbeidet vidare. Målet er å skape meir aktivitetar og engasjement rundt kampane på Fosshaugane, skape gode tilbod for både supportarar og kundar, og bidra til auka engasjement rundt klubben ute i regionen.
Samstundes skal samarbeidet bidra til å styrkje Wattn si tilknyting til regionen. Som eit vestlandsforankra straumselskap med eigarar som mellom anna Sognekraft, deler Wattn og Sogndal Fotball eit sterkt engasjement for lokal verdiskaping og utvikling.
– Me er svært glade for at Wattn vel å vere med vidare. Dei har vore ein positiv og engasjert samarbeidspartnar, og forlenginga gir oss moglegheit til å byggje vidare på eit godt samarbeid og skape verdi både for kvarandre, supportarane våre og lokalsamfunnet, seier konstituert dagleg leiar i Sogndal Fotball, Ingrid Narum.
Sogndal Fotball er glade for at Wattn vel å vere med vidare, og ser fram til ein ny sesong med godt samarbeid både på og utanfor bana.
