Nær siger i Egersund: – Føler veldig med gutane no

Det vart ein dramatisk kamp i Egersund søndag ettermiddag. To skåringar av KP Arierhi og eitt mål frå Vegard Hagen sørgde for at Sogndal snudde kampen til 3–2.

• Sogndal - Raufoss onsdag kl. 19.00: Billettar her! Kun 100 kroner.
• Heiarop-konkurranse: Vinn jubileumsoppleving!

Men heilt på tampen sette heimelaget inn utlikninga etter vedvarande press. Dermed glapp to svært viktige poeng i kampen om å halde plassen i OBOS-ligaen.

– Slik kampen vart, er eg veldig skuffa over at me slepper inn på slutten. Eg føler veldig med gutane no. Dei får marginane mot seg. Dei får eit frispark heilt på slutten, og så går det ein opp og skårar. Det kjennest som eit tap, seier hovudtrenar Eirik Bakke.

– Enorm vilje og lagånd

Sjølv om Bakke var skuffa over resultatet, trekte han fram innsatsen til spelarane.

– Det er ikkje heilt ufortent at dei skårar. Dei var nære eit par gonger. Me klarer ikkje heilt å stå distansen, men det er ein enorm vilje og lagånd i denne gjengen. Det hadde fortent betre.

Han var også nøgd med at KP Arierhi fann nettmaskene to gonger.

– KP skåra to mål. Det er positivt og viktig for oss. Men akkurat no er me skuffa.

Vegard Hagen skåra igjen i Egersund. I fjor skåra han ein susar frå eigen banehalvdel. Søndag ettermiddag heada han inn 3-2 etter eit innlegg frå Kasper Skaanes.

Ny sjanse onsdag

Allereie onsdag ventar ein ny viktig kamp når Raufoss kjem til Fosshaugane Campus.

– Før kampen hadde me kanskje teke eitt poeng, slik situasjonen vår er. No får me ta Raufoss på onsdag, smelle til på Fosshaugane med tre poeng og byggje vidare på dette, seier Bakke.

Sogndal – Raufoss
Onsdag 21. oktober kl. 19.00
Fosshaugane Campus

Billettar her! Kun 100 kroner.