Sjå høgdepunkt: Surt tap etter heroisk innsats

Det enda med eit surt 2-3-tap mot Strømsgodset på Fosshaugane Campus søndag ettermiddag. Sogndal slo tilbake både til 1-1 og 2-2, men etter to raude kort vart oppgåva for tøff. Gjestene sikra sigersmålet heilt på tampen av ordinær tid.

Ei fin markering til minne om Kong Harald før kamp.

Heimelaget hamna tidleg under, men viste god moral og svara raskt. Lukas Vapne fann Kasper Skaanes med ein nydeleg stikkar. Skaanes var iskald åleine med keeper og trilla inn 1-1.

Godset tok leiinga på nytt før pause.

Etter kvilen pressa me på. Til slutt kom betalinga. Atli Barkarson fann KP Arierhi inne i boksen, og han breisida inn si første Sogndal-skåring.

På det tidspunktet hadde Sogndal fått tak på kampen og skapt momentum framfor eit engasjert heimapublikum.

Så kom situasjonane som skulle prege resten av oppgjeret.

KP skåra

To raude kort gjorde arbeidsvilkåra svært vanskelege for sogndølene. Først fekk Tuomas Pippola sitt andre gule kort etter litt knuffing og dialog med dommaren. Ikkje lenge etter fekk Ronney Onyango direkte raudt kort etter ei takling.

Trass i at me vart reduserte til ni spelarar, nekta laget å gi seg. Dei som stod att på bana jobba knallhardt for kvarandre, forsvarte seg med stor innsats og såg ut til å berge eitt poeng.
Men då klokka nærma seg 90 minutt, fann gjestene vegen til nettet og sikra 3-2-sigeren.

Eit surt tap. Me hadde fått meir og meir grep om kampen før utvisingane. Etter å ha kjempa oss tilbake to gonger hadde me teke over kampen og var det førande laget.

No gjeld det å rette fokuset mot neste oppgåve: Haugesund borte neste helg.

STAO NO PAO

Lukas Gausdal debuterte.