Sjå samandrag: For ein dramatikk!

Etter å ha lege under 0–2 tok me over kampen, skapte ei rekkje store sjansar og fekk endeleg betalt heilt på slutten.

Dermed henta me poeng med ei sein utligning for andre gong på kort tid (3-3 mot Bryne). No har me fire kampar på rad utan tap.

Mot Hødd var det igjen vilje, trykk og tru som bar oss fram. Etter å ha lege under 0–2 etter 26 minutt tok trenarteamet nokre grep. Kampbiletet snudde, og me pressa Hødd over lang tid. Reduseringa kom etter 68 minutt.

Då klokka hadde passert 90 minutt, låg det framleis an til heimesiger i Ulsteinvik. Men Sogndal gir seg aldri.

Dommaren la til sju minutt. Og i det siste minuttet skulle det skje. Målsniken Oliver Hintsa var på rett plass til rett tid, som så mange gonger før.

Hans første scoring for sesongen sørgde for eitt poeng i Ulsteinvik.

Slik var kampen

Hødd fekk ein draumestart og straffa oss tidleg. Dei kom seg ned på sida, slo ballen skrått ut i feltet og fekk sett inn leiarmålet. Kort tid etter var dei farleg frampå igjen, og sjølv om me byrja å jobbe oss inn i kampen, var det heimelaget som fekk den neste scoringa. Endå ein gong kom innlegget frå sida, og denne gongen sat avslutninga kontant i nettet.

Me var likevel langt frå ute av det. Før pause trudde me at me hadde redusert då Onni Helén brassesparka ballen i mål etter innlegg frå barndomskamerat Tuomas Pippola, men dommaren stoppa det heile for farleg spel.

Trenarteamet gjorde nokre justeringar, og me byrja å ta meir og meir over kampen i dei siste minutta før pause.

Sebastian Pedersen var nære fleire gonger, både med headingar frå kloss hald og avslutningar som så vidt mangla presisjon.

Trykket gav til slutt resultat. Eit godt innlegg frå Skaanes fann hovudet til Pedersen, og denne gongen sat han. Reduseringa tende eit nytt håp.

Resten av oppgjeret handla om eitt lag som jaga og eitt lag som heldt unna. Me heldt fram med å fylle på med folk, Pippola var nær etter ei ny heading, og til slutt tok me sjansar. Me sette inn offensiv slagkraft, og til slutt stod me igjen med berre Sander Granheim som rein forsvarsspelar. I ei offensiv trebackslinje var han flankert av Vegard Hagen og Elias Flo.

Dommaren la til sju minutt, og det var akkurat det me trong. Etter ein corner klarte ikkje Hødd å få ballen unna. Eit nytt innlegg kom inn i feltet, via Sander Granheim, og der dukka Oliver Hintsa opp. Med ro og presisjon sette han ballen i mål.

Utligninga sat i siste minutt. Igjen hadde me henta oss inn.