Sogndal Akademiet med sterk start på 2026-sesongen

Med heile 87 aktive spelarar, eit tett samarbeid med Høgskulen på Vestlandet (HVL) og ein tydeleg sportsleg modell, har Sogndal Akademiet fått ein svært god start på fotballåret 2026.

Aktiviteten i Sognahallen er høg gjennom heile veka, og både spelarar og trenarar opplever eit utviklingsmiljø prega av kvalitet og trivsel.

– Målet vårt er å skape eit utviklingsmiljø der kvalitet, tryggleik og speleglede står i sentrum, seier akademileiar Adrian Gjengår.

Jamn vekst og høg aktivitet

Etter ein solid haust i 2025 har akademiet teke nye steg inn i det nye året. Med stadig fleire deltakarar opplever akademiet at tilbodet treff godt blant barn og unge i regionen.

– At me no har 87 spelarar med på trening, viser at tilbodet fungerer. Ungane trivst, og det er det viktigaste for oss, seier Gjengår.

Treningskvardagen er strukturert slik at alle aldersgrupper får best mogleg oppfølging:

• Måndag: Spelarar fødde i 2016-2018 (jamn fordeling jenter og gutar)
• Tysdag: Spelarar fødde i 2014 og 2015 (akademiet si største gruppe)
• Torsdag: Keeperskule og trening for 2019- og 2020-kulla
• Laurdag: Miniakademiet for dei yngste, fødde i 2021

For dei yngste står leik og ballkontroll i fokus, medan dei eldre jobbar meir med spelforståing, samhandling og posisjonering.

Kompetanse på feltet

Ein viktig grunn til den gode utviklinga er samarbeidet med HVL, der idrettsstudentar bidreg som instruktørar.

– Studentane tek med seg oppdatert fagkunnskap rett ut på treningsfeltet. Det gir øktene ein tydeleg struktur og høg kvalitet, forklarer Gjengår.

Kvar treningsøkt på 75 minutt er nøye planlagt med oppvarming, ferdigheitsøvingar og spel tilpassa alder og nivå.

Arena også for trenarar

Akademiet er ikkje berre ein stad for spelarutvikling, men også ein inngangsport for unge trenarar som ønskjer erfaring og fagleg utvikling. Gjennom tett oppfølging og praksis i felt får trenarspirer moglegheit til å utvikle seg innanfor Sogndal Fotball sitt system.

Tydeleg retning for framtida

Gjengår meiner arbeidet dei la ned i 2025 no byrjar å gi resultat.

– Det er kjekt å sjå korleis miljøet har vakse. Energien på trening er smittande, og me opplever at me er på rett veg. Ambisjonen er å utvikle glade, kreative og intelligente spelarar som trivst både på og utanfor bana, seier han.

Akademiet ønskjer også å vere ei viktig kraft i lokalsamfunnet.

– Det handlar ikkje berre om fotball, men om meistring, fellesskap og gode verdiar. Me ønskjer at barna skal bli sett og oppleve utvikling i trygge rammer.

Rom for fleire

Sjølv om akademiet veks, er det framleis plass til fleire spelarar og trenarar. Satsinga på jentegrupper gir også resultat, og måndagstreningane har no jamn fordeling mellom jenter og gutar.

– Den utviklinga er me stolte av, og noko me ønskjer å bygge vidare på, avsluttar Gjengår.

For meir informasjon om treningstider og påmelding kan interesserte besøke nettsidene eller ta direkte kontakt med akademiet. 

Informasjon og påmelding Akademiet vår 2026

Velkomen til Sogndal Akademiet!

STAO NO PAO!