Spennande forsvarsspelar har signert
Martin André Sjølstad blir Sogndalsspelar
Sogndal Fotball og Kristiansund BK er samde om ein overgang for forsvarsspelar Martin André Sjølstad (f. 9. juli 2000). Martin har allereie slutta seg til vår tropp og er med på treningsleiren i Spania.
Sogndal Fotball og Martin André Sjølstad har signert ein avtale som strekkjer seg ut sesongen 2025.
- Etter lengre tids arbeid inn mot både Martin og KBK er det gledeleg at me no kunne ønskje spelaren velkomen til Sogndal, seier Håvard Flo.
Martin er ein spelartype som vil passa godt inn på Fosshaugane.
- Her får me ein venstreback med stor løpskraft, han er rask og offensiv og vil passa godt inn i måten me ønskjer å spela. Han er óg ein fin fyr som vil passa godt inn i gruppa vår, seier Flo.
Martin starta fotballkarrieren i Drøbak-Frogn før han gjekk til Follo. Der spelte han ungdomsfotball ein del sesongar før han vart henta opp i A-stallen i 2017. I Follo spelte han i lag med vår toppspelarutviklar Patrik Karoliussen to år og han står med 56 kampar og ni skåringar i den lyseblå drakta.
Deretter reiste han til Strømmen og spelte der sesongane 2020 og 2021, kor han i løpet av sine 43 kampar fekk spela mot Sogndal to gonger. Han står med ei skåring for Strømmen.
Martin vart henta til KBK før 2022 sesongen der han spelte tre kampar. På somaren i fjor slutta han seg til Kongsvinger på ein utlånsavtale ut sesongen, og fekk vera med på den utruleg flotte haustsesongen som nesten enda med opprykk til Eliteserien. Han spelte 21 kampar og skåra eitt mål i perioden i KIL.
- Me har fulgt med på Martin over eit lengre tidsløp, og beit oss godt merke i hans strålande haustsesong for Kongsvinger. Me følte at tida var inne for å gjera han til Sogndalsspelar no, seier Flo.
Det var ikkje berre å henta Martin til Sogn.
- Etterkvart vart det ein litt krevjande case då KBK ikkje hadde lyst å selge spelaren. Andre klubbar var og på ballen, då han begynte å bli veldi attraktiv i marknaden. Me er veldig glade for at me fekk denne avtalen i boks, seier Håvard Flo, før han vil retta ein takk til Kristiansund for god handsaming under heile prosessen.
No gler me oss til å bli betre kjent med Martin, og ønskjer han velkomen til Saftbygda!
