Takk for innsatsen: Terje Teigen

Gjennom mange år har det gode humøret og smilet til Terje Teigen vore ansiktet utad mot våre flotte samarbeidspartnarar. 7 år som marknadsansvarleg i Sogndal Fotball gjer han til ein av dei lengstsitjande i Norsk Toppfotball, og no er tida i klubben over for denne gong.

Terje fortel om ei fin tid i klubben, sjølv om det har vore tøffe tider i perioden han har hatt rolla:

- Det har vore mest solskinnsdagar, men det har også vore mange dagar med overskya og vind frå alle kantar, om ein kan seie det på den måten. Det har vore krevjande tider, og eg mista mange kollegaar tidleg i min periode. Så kom det korona og renteoppgang, og me har ikkje nådd målsettinga på sport om å rykke opp til Eliteserien. Det er sjølvsagt faktorar som har har lagt føringar for arbeidet, men me har alltid gjort så godt me kan og vore offensive i møtet med næringslivet. Det har jo vore eit team dette her, og dei andre i administrasjonen har vore eit godt lag som legg til rette for at me kan levere på det me sel til partnarane. Jobben har vore veldig spennande og kjekk, og eg ser tilbake på ei fin tid i klubben.

Terje kom inn som marknadsvansvarleg i 2018, og har vore med på mykje i løpet av desse åra. Klubben har vore gjennom gode og dårlege periodar sportsleg, og marknaden blir stadig tøffare og meir pressa. Difor ønskjer Terje å rette ein takk til alle dei trufaste partnarane som har vore med oss i mange år.

- Eg har sett utruleg stor pris på alle partnarane våre. Dei har teke i mot meg med opne armar, og me har funne dei beste løysingane basert på føresetnadane i klubb og hjå den enkelte partnar. Mange har hatt forståing for situasjonen til klubben, og me har alltid vorte einige om avtalane. Ein ting er å selje produkt, men ein må også kunne levere på tinga ein sel, og der har det endra seg ein del dei siste åra. Før hadde gjerne bedriftene eigne tilsette på marknad som kunne sette i gang prosessar, medan no ligg ein større del av ansvaret på våre eigne ressursar. Dette er noko ein også ser nasjonalt, og som dei andre klubbane merkar som ei utfordring.

- Eg trur det kan vere bra for klubben at ein ny person kjem inn og kan tenke litt nytt, og at nokre nye auge kan bidra med tankar og idear. Sjølv om ein har lyst til å gjere nye ting, vil det bremse litt at ein også må ha ressursar til å gjennomføre det. 

No ventar nye og spennande utfordringar, og koplinga til næringslivet er framleis relevant. Frå 1. desember blir han senterleiar for Pyramiden senter i Gaupne, og skal bidra til å utvikle næringslivet i nabokommunen. Terje fortel at det blir rart å skulle gjere noko nytt, men at det kjennest ut som eit riktig val:

- Eg trengde å skulle gjere noko nytt. Det blir noko heilt anna enn det eg har gjort no, men det handlar om sal og å bygge merkevare. Det er det eg har brunne for i denne jobben også, og som eg kjem til å ta med meg inn i ny jobb. Eg veit framleis ikkje heilt kva som ventar meg, og no kjem datoen fort, men eg kjem til å bruke den fyrste tida på å bli kjend med jobben. Det blir spennande å kome i gang, fortel han.

- Så kjem eg sjølvsagt til å sakne dette enormt. Det er jo ein familie, og ein blir godt kjend med masse kjekke folk både lokalt, regionalt og nasjonalt. Det blir litt rart, legg han til.

- Eg vil også takke dei frivillige og alle supporterar som støttar opp om klubben. At folk står på og hjelper til er det berre å ta av seg hatten for. Så vil eg takke administrasjonen og tidlegare kollegaar for desse fantastiske åra. Dette er ein gjeng som jobbar hardt for kvarandre, og for at klubben skal lykkast, avsluttar han.

Sogndal Fotball ønskjer masse lukke til i ny jobb, og vil samtidig takke for innsatsen i alle desse åra! Me kjem til å sakne det gode humøret, og håpar me sjåast igjen i framtida!

STAO NO PAO!