Tap mot Bryne: – Eg ser konturane av noko i laget

Sogndal tapte søndag kveld 0-2 mot Bryne på heimebane.

– Det vart jo ein stillingskrig, som forventa eigentleg. Små marginar avgjer. Me hadde eit skot med Kasper i stolpen tidleg, og det kunne blitt eit litt anna kampbilete, seier Eirik Bakke.

I staden var det Bryne som tok leiinga etter eit velplassert skot frå hjørnet av 16-meteren. Bryne auka til 2-0 på ei kontring etter at Sogndalhadde kasta alt fram i jakta på utligning.

Likevel var det fleire ting Bakke likte.

– Eg tek med at me ser mykje betre ut defensivt. Strukturen ser mykje betre ut enn førre helg, og me er veldig konkurransedyktige i dag, føler eg. Det er sjølvsagt skuffande å tapa, men eg ser konturane av noko i laget.

– Likar godt Haruna som kjem inn og spelar godt. Solid kamp frå han. Emil (Hillestad) veks seg inn i kampen i ei rolle som han ikkje har spela før (vingback), og Ronney (Onyango) kjem inn der og er god i posisjonen sin. Han vil få meir speletid, seier Bakke.

Samtidig peikar Bakke på fleire område laget må utvikla.

– Me må bli betre med ball. Me har litt for mange balltap i første omgang. Me må jobba med det slik at me har kontroll på ballen og held på han lenger.

No rettar laget blikket mot neste oppgåve.

– Når Sandnes Ulf kjem, så må me opp i ringane att og byggja vidare på det me gjorde best i dag.