Sjå samandrag: Tap mot gamle kjenningar

Sogndal tapte 0–2 mot Sandnes Ulf og Sogndal‑kjenningar andre pinsedag.

Heimelaget tok leiinga etter eit langt oppspel tidleg i første omgang. Me fekk ikkje klarert, og sist på ballen var Mathias Sundberg.

Han kjenner me godt. Mathias gjekk gradene i Sogndal Fotball heilt frå miniputt til A‑laget.

Etter Sogndal‑karrieren har han vore innom Ull/Kisa, Bjarg (lån) og Strømmen. Før årets sesong signerte Sundberg for Sandnes Ulf.

Etter pause gjorde me ei tidleg justering. Sebastian Pedersen kom inn.

Dessverre auka Sandnes Ulf leiinga etter eit skot som trefte stolpen og deretter ryggen til Lars Jendal, vår beste spelar i kampen, før ballen trilla inn i mål.

Me forsøkte ein ny sluttspurt, men fekk ikkje utteljing denne gongen. På overtid heada innbytar Fábio Sturgeon i stolpen. Nærare kom me ikkje.

Sogndal‑utlånte Jamal Haruna leverte ein god kamp på midtstopparplass for Sandnes Ulf. Ved sida av seg i forsvaret hadde han ein annan Sogndal‑kjenning, nemleg Axel Kryger, som spelte i kvitt og svart mellom 2020 og 2022.

Etter fem kampar på rad utan tap vart rekkja broten i dag. No ventar Strømmen borte på søndag. Då må me opp nokre hakk.