Sjå samandrag: Tap mot Lyn

Sogndal tapte 0–3 mot Lyn i den andre serierunden på Fosshaugane Campus. Gjestene var effektive i første omgang og gjekk til pause med 3-0.

– Førsteomgangen er ganske jamn. Me har mykje ball og kjem til nokre gode sjansar, men me skårar ikkje på dei. Motstandaren har fem skot og skårar på tre av dei. Det er sjølvsagt krevjande for oss. Me går i garderoben med tre mål i mot, sjølv om det ikkje har vore ein 0–3-kamp, seier hovudtrenar Luis Pimenta.

Lyn tok leiinga etter 14 minutt då Andreas Hellum sette ballen i mål. Same mann dobla leiinga åtte minutt seinare, før Anders Bjørntvedt Olsen auka til 3–0 like før pause. Sogndal sleit med å få utteljing på eigne periodar i kampen.

Etter kvilen fekk me betre kontroll på spelet og skapte fleire situasjonar rundt Lyn-boksen, men utan å få utteljing. Gjestene forsvarte seg godt og heldt unna, slik at resultatet stod seg kampen ut.

– Me går ut i andre omgang med ingenting å tape og tek større risiko. Me skapar nokre gode sjansar. Hadde me sett nokre av dei tidleg i andre omgang, kunne det gitt oss momentum og gitt supportarane litt glede. Når det ikkje skjer, blir det tungt, seier Pimenta.

Dermed står Sogndal utan poeng etter to serierundar.

No handlar det om å jobbe vidare, vise karakter og slå tilbake i dei komande kampane.

– No startar me med 0–7 etter to kampar. No handlar det om å reise til Marienlyst, banen til den største favoritten, og vise at me har personlegdom til å spele kampen slik han er – utan å tenkje på starten som har vore, seier Pimenta.