Sogndal Fotball og Florø Fotball er samde om ein utlånsavtale for keeper Håvard Hetle (f. 5. februar 2003). Avtalen strekkjer seg ut sesongen 2021.

Håvard tek med seg flyttelasset til Palmekysten i helga, og stiller på første trening måndag 15/2.

- Det er viktig at Håvard får ein god kamp- og treningskvardag, og det er me sikre på at han vil få i Florø, som skal spela i PostNord-ligaen, seier Håvard Flo.

- Eg er veldig motivert for å reise ut til Florø for å kjempa meg til ein plass på laget der, seier Håvard - som og tykkjer det er trist å reise frå gjengen han er ein del av her.

Ambisjonane til den unge keeperen er å spela seg inn på laget og få så mange kampar som mogleg i ein tøff PostNord-liga.

- Hovudmålet mitt er å prestera så bra i år at Sogndal ønskjer meg tilbake, smiler Håvard.

Keepertrenar Geir Stenehjem skal ha tett dialog med både Håvard og trenarane gjennom sesongen.

- - Eg tek meg nokre turar ut til kysten, både for å sjå treningar og kampar, og Håvard har fått litt "lekser" - eg gler meg veldig til å få han tilbake, seier Geir.

Me ynskjer Håvard masse lukke til i Florø!