Pimenta: – Me skal slå tilbake

Det vart ein tung start på sesongen for Sogndal, som tapte 0–4 borte mot Odd på Skagerak Arena måndag kveld. 

– Eg må berre be om orsaking overfor supportarane våre og alle dei unge spelarane som spelar for klubben og ser på oss, og har venta på sesongstarten, seier ein skuffa hovudtrenar Luis Pimenta.

– Ein ting kan me garantere: Det blir ikkje fleire kampar der me ikkje er til stades. Me svarar med ein gong mot Lyn om fem dagar, seier Pimenta.

Sjå samandrag:

Kunne ta leiinga

Allereie etter seks minutt var me nære ved å ta leiinga. Diogo Brás slo eit innlegg mot bakerste stolpe, der Oliver Hintsa stanga ballen i stolpen via hanskane til Odd-keeperen.

I staden var det Odd som fekk utteljing kort tid etter. Etter åtte minutt vart Noah Kojo spelt fri og sette ballen kontrollert i lengste hjørnet til 1–0.

Minuttet seinare fekk Sebastian Pedersen ei god moglegheit etter rot i Odd-forsvaret, men avslutninga vart aldri heilt rein.

Garanterer

Etter 19 minutt dobla heimelaget leiinga då Odds nye spiss Sanel Bojadzic heada inn 2–0 etter eit innlegg frå venstre.

I det 76. minutt auka heimelaget til 3–0, før Syver Aas fastsette sluttresultatet til 4–0 på overtid.

Pimenta peika på fleire moglege forklaringar på kvifor Odd fekk overtaket, både fysisk og mentalt.

– Det var ein kamp der me ikkje var til stades, rett og slett. Når det er noko som var frå alle spelarar, då er det mi førebuing som var feil, seier Pimenta.

– Om det var fysisk sett, fordi dei sprang meir, eller mentalt sett, fordi dei vann fleire duellar. Det er noko der har eg bomma på i vekesyklusen.

Sogndal får no kort tid til å slå tilbake. Allereie på laurdag kjem Lyn på besøk til Fosshaugane Campus.