Sogndal Fotball og Kjelsås Fotball er samde om ein overgang for midtbanespelar Jacob Blixt Flaten, f. 12. april 2002. Avtalen strekkjer seg ut 2026-sesongen.

- Me har jobba med Jacob over lengre tid no, og er særs glade for at me har fått dette i mål. I Jacob får me ein spelar med entusiasme i spelet og god løpskapasitet. Gjennom sin erfaring vil han vera ein som vil ta for seg og diktere spelet både offensivt og defensivt, seier Håvard Flo.

Jacob byrja karriera si i Nordstrand der han spelte på aldersbestemt nivå. Som 12-åring vart han oppdaga av Liverpool og fekk prøve seg på trening og i treningskampar mot nokre av dei beste 12- og 13-åringane i England. Her leverte han så godt at han fekk kontrakt med den engelske storklubben. I perioden 2015-2017 spelte han for Nordstrand heime i Norge, medan han reiste til Liverpool i skuleferiane for å spele mot lag som Milan, Galatasaray, Juventus, og Manchester United. Liverpool ønskja til slutt å signere Jacob, men overgangen gjekk ikkje gjennom grunna uenigheit mellom klubbane. 

I 2018 meldte han overgang til Vålerenga og har kampar for både G16 og G19 hjå hovudstadslaget. Seinare har han også spelt både Norsk Tipping-ligaen og PostNord-ligaen for Vålerenga 2. Etter nokre år i Vålerenga gjekk turen til Kjelsås før 2021-sesongen. Etter skadeproblematikk i 2021 har 2022 og 2023 gitt 55 kampar i PostNord-ligaen og i NM. Han var også ei viktig brikke i eit Kjelsås-lag som spelte seg fram til semifinale i cupen. Der vart cupvinnar Molde for sterke og stakk av med sigeren.

Håvard Flo fortel vidare:

- Etter nokre gode sesongar i Kjelsås, med blant anna toppkampen mot Molde i NM-semifinale begynte ballen å rulle for Jacob. Interessa frå klubbane auka og fleire klubbar i dei to øverste divisjonane har konkurrert om signaturen hans. Etter gode samtalar med fleire i klubb vart etter kvart Jacob overtydd om at Sogndal ville vera ein flott klubb å vidareutvikle seg dei neste åra.

No er Jacob klar for å ta steget opp til OBOS-ligaen, og gler seg til å spela i kvitedrakta:

- Det følast veldig bra å signere for Sogndal, og eg har fått eit godt fyrsteinntrykk av bygda og klubben. Det er veldig fint her, og klubben har flotte fasilitetar.

Kva gjorde at du ynskte å signera for Sogndal?

- Det har vore mykje tenking den siste tida, og eg har hatt gode samtalar med klubben. Eg føler at Sogndal er ein bra plass å koma til. Det var Sogndal som hadde den beste planen for meg, og eg føler at spelestilen passar meg godt.

Jacob kom til Sogndal i dag og er med resten av troppen når dei byrjar sesongoppkøyringa i morgon, onsdag. 

Me ønskjer Jacob velkomen til Saftbygda og gler oss til å sjå han i aksjon!

STAO NO PAO!