Sogndal Fotball og HamKam Fotball er samde om ein overgang for keeper Lars Larsson Jendal, f. 24. april 1999! Avtalen strekkjer seg ut 2026-sesongen.

Lars har vore HamKam-spelar i heile si profesjonelle karriere. Han har spelt for både G14, G16 og G19 i klubben, og fekk etter kvart debuten for A-laget. I 2018 reiste han på lån til Nybergsund og fekk 25 kampar i PostNord-ligaen. Året etter gjekk turen til Asker på eit nytt lån. Her vart det 13 kampar i PostNord-ligaen og retur til HamKam etter sesongen. I 2020 var han fyrstekeeper for HamKam i OBOS-ligaen, og spelte mot oss på Fosshaugadn. Eit nytt utlån venta i 2021 når han reiste sørover til Arendal og PostNord-ligaen. I 2022 tok HamKam steget opp til Eliteserien og Lars fekk prøve seg på landets øverste nivå. På to sesongar i Eliteserien vart det 15 kampar og 5 kampar i cupen. No går turen til Saftbygda på ein permanent overgang. 

Lars trenar med laget for fyrste gong i dag klokka 12. No er han klar til å kome i gang med oppkøyringa og ser fram til å spela på Fosshaugadn:

- Det føles veldig bra å koma til Sogndal. Anlegget ser meget bra ut, og eg gler meg til å spela her. Det er godt å få ein permanent overgang, og eg føler det var riktig for karriera mi no.

Håvard Flo er nøgd med å få avtalen i hamn:

- Det har vore ein fin prosess med både spelar og klubb, og me er særs nøgd med å få med Lars på laget. Me har brukt litt tid, men no er avtalen endeleg i boks. Me håpar å få mykje ut av Lars den kommande tida.

Me ønskjer Lars velkommen til Sogndal og gler oss til å sjå han i aksjon! Intervju med vår nye keeper kjem seinare.

STAO NO PAO!