Vellukka sesongavslutning for breiddefotballen!
Oppsummering av sesongen og velfortent heider til breiddeavdelinga Breiddefotballen
På same måte som dei siste åra vart det gjennomført sesongavslutning for breiddefotballen på Quality Hotel Sogndal. Her samlast trenarar og lagleiarar frå breidden for ei kjekk oppsummering av sesongen, informasjon og velfortent heider til utvalde personar. Kvelden vart avslutta med pizza og sosialt. Takk til dei over 60 som møtte!
Sportsleg leiar breiddeavdeling, Kristian Ask stod for programmet, og byrja med å oppsummere sesongen for breiddeavdelinga. Det har vore eit nytt år med mykje aktivitet, og mange har vore i aksjon. Tala viser at ein har auka til rundt 600 medlemmar, der 56,5% er gutar og 43,5% er jenter. Ein er totalt 120 frivillige trenarar og lagleiarar i klubben, noko me er veldig glade for.
Breiddeavdelinga er også viktig for at me skal klare å gjennomføre alle arrangementa våre. Kvar einaste heimekamp er det minimum 45 frivillige frå breiddelaga som stiller på dugnad. Desse er heilt avgjerande for at kamparrangementet skal gå som planlagt. Både Lerum Cup og Kiwi Bama Cup hadde rekordstor påmelding i år, og utan innsatsen frå breiddeavdelinga ville det rett og slett ikkje vore mogleg. Tusen takk!
Mange av laga våre har også hevda seg både i seriespelet og i diverse turneringar. Det er kjekt å sjå at Sogndallogoen er synleg både lokalt og nasjonalt, og me er stolte over alle dei som representerer klubben på ein god måte. Følgjande lag har utmerka seg med meritt denne sesongen:
- J13-14, Kretsmeistrar
- J15-17, Kretsmeistrar
- Sogndal 2 (herre), Kretsmeistrar
- J14 Gull, Lerum Cup
- J16 Bronse, Norway Cup
- J15 Sølv, Adidas Cup
Årets eldsjel
Sogndal Fotball vil årleg utnemne "Årets eldsjel i Sogndal Fotball" som har gjort ein særskild innsats, med ein profil som passar til kjerneverdiane våre: "Ambisiøs, utviklande, inkluderande og ærleg". I år går prisen til to ulike vinnarar, då begge er særs gode nominasjonar og verdige vinnarar av utmerkinga.
"Vinnaren av prisen har ei unik evne til å sjå spelarane og å vera inkluderande. Vinnaren er alltid blid og positiv, som smittar på dei rundt seg. Sjølv med ein travel kvardag, strekk denne eldsjela seg langt for å prioritere treningar og at spelarane skal trivast." Årets eldsjel er Trine Ruud Sætre. Me gratulerer så mykje!
"Vinnaren av prisen er involvert i to lag. Vinnaren er svært strukturert, tydeleg og er ein person som spelarane lyttar til. Trenarteamet beskriv vinnaren som heilt avgjerande, og at det er ein person som tek på seg mykje av planlegginga og organiseringa av aktiviteten. I tillegg til dette, er det også ein person som er tydeleg ovanfor klubb med gode innspel." Årets eldsjel er Daniel Kvåle. Me gratulerer så mykje!
Heidersprisen
Sogndal Fotball vil i enkelte tilfelle rette merksemd mot bidragsytarar som har gjort ein ekstraordinær innsats i klubben. Heidersprisen i Sogndal Fotball skal gå til personar som over lengre tid har lagt innsats, vilje og engasjement i arbeidet med barn- og ungdom i fotballen:
"Heidersprisen går til ein person som har vist at dei sterkaste prestasjonane kjem gjennom trivsel og fellesskap. Med eit varmt blikk for menneska rundt seg, stor omsorg og eit ekte engasjement for læring og utvikling, har vinnaren delt kunnskap og skapt verdiar som vil leve vidare i Sogndal Fotball" Heidersprisen går til Nils Tore Krosshaug. Me gratulerer så mykje!
Tidlegare i haust vart det kjent at Kristian Ask trer ut av rolla si i Sogndal Fotball, og at han frå 1. januar skal vidare til nye utfordringar i NFF Sogn og Fjordane. På avslutninga i går fekk han vel fortent heider for jobben han har gjort i klubben, og styreleiar Jan Rune Årøy og styremedlem Knut Armand Iversen overrekte ei blomehelsing på vegne av klubben. Tusen takk for fantastisk innsats!
Sogndal Fotball ønskjer å takke alle som har gjort ein innsats i breiddeavdelinga i løpet av sesongen! Det er fantastisk mykje bra ein får til med flinke frivillige, og me er evig takknemlege for innsatsen som blir lagt ned! No er det på tide med ein god pause frå fotballaktiviteten, og så er me klare for ein ny sesong når kalenderen viser 2026!
STAO NO PAO!
