Me er klare til runde 11 av årets OBOS-liga, og i dag får me besøk av Strømmen.

Det er to veker sidan me herja borte mot Sandefjord, og det har vore ein pause for OBOS-ligaen. No tek me til att, og kampen i dag markerar starten på ei veke med tre heimekampar; Strømmen i dag, cupkamp mot Brann på onsdag og neste helg får me Skeid på besøk under Lerum Cup. 

Sist helg tok karane turen til Bømlo og spelte treningskamp mot Brann. Ein såg der mykje av det same som mot Sandefjord, og etter ei god veke med trening, ser me fram til dagens kamp. Me håpar at mange kjem og støttar oss!

Runden
Dette er den 11. serierunden av årets OBOS-liga, og den tjuvstarta i går då Kongsvinger tok ein sterk 4-2 siger heime mot Start. Her er rundens kampar:

Kongsvinger - Start 4-2 (Spelt laurdag)

HamKam - Aalesund kl. 15.00
Jerv - Sandnes Ulf kl. 18.00
Notodden - Sandefjord kl. 18.00
Skeid - KFUM kl. 18.00
Sogndal - Strømmen kl. 18.00
Tromsdalen - Nest-Sotra kl. 18.00
Ull/Kisa - Raufoss

Vêrmeldinga
Det var ein alldeles strålande sommardag i går. I dag er me tilbake til kvardagen, og den vakre bygda vår ligg bada i regn. Det skal i følge Yr letta og bli finare utover dagen, og når kampen startar skal det vera sol og lettskya, og i underkant av 18 grader. 

Kle deg i Svart og Kvitt og kom på kamp!
Me treng vår tolvte mann i dag, og vil bli veldig glade om me ser deg på Fosshaugane! Ta turen og støtt karane i kampen om dei viktige poenga. 

Billett til kampen kan du kjøpa her

11. serierunde i OBOS-ligaen 2019

Sogndal - Strømmen
Fosshaugane
Avspark kl. 18.00

Stao no pao!!