Sogndal Fotball og Levanger er samde om ein utlånsavtale for angriparen Kasper Nissen. Avtalen går ut sesongen 2018.

Kasper kom til Sogndal frå Nest-Sotra før sesongen 2017, men hadde berre vore her nokre veker før han rauk korsbandet i kneet. Han brukte heile fjoråret til opptrening etter skaden.

For å få meir jamnleg speletid, går han no på eit utlån til divisjonskollega Levanger.

- Me har tru på Kasper, og ser at han har eit stykke att før han er heilt klar for førstelagsspel i Sogndal. No får han sjansen til å spele fotball på eit høgt nivå ut året, og me har tru på at me får ein god Kasper med oss i treningsgruppa etter nyttår. seier sportsleg leiar Håvard Flo.

Levanger ligg utsett til på tabellen og treng sårt både poeng og skåringar. Der får Kasper Nissen no sjansen til å bidra ut året. Me ynskjer Kasper og Levanger lukke til!